दिल्ली हादरली! लाल किल्ल्याजवळ भीषण स्फोट – ८ ठार, २० हून अधिक जखमी; तपास यंत्रणा सतर्क
दिल्ली :
दिल्लीच्या हृदयस्थानी असलेल्या लाल किल्ला मेट्रो स्टेशनच्या गेट क्रमांक १ समोर काल (१० नोव्हेंबर २०२५) संध्याकाळी सुमारे ६:५२ वाजता झालेल्या भीषण स्फोटाने संपूर्ण देश हादरला. सुरुवातीच्या माहितीनुसार, एका कारमध्ये हा स्फोट झाला आणि काही क्षणांतच परिसरात आग पसरली. या घटनेत ८ जणांचा मृत्यू, तर २० पेक्षा अधिक लोक गंभीर जखमी झाल्याचे अधिकाऱ्यांनी पुष्टी केली आहे.
स्फोट इतका तीव्र होता की आसपास उभ्या असलेल्या अनेक वाहनांना आग लागली, तसेच काही दुकाने आणि फूटपाथवरील स्टॉल्सही नुकसानग्रस्त झाले. अग्निशमन दलाच्या १० गाड्यांनी घटनास्थळी धाव घेत आग नियंत्रणात आणली. स्थानिक पोलिसांनी तत्काळ परिसर बंदिस्त केला असून, लाल किल्ला मेट्रो स्टेशन आणि चांदणी चौक परिसरातील वाहतूक काही काळासाठी पूर्णपणे थांबवण्यात आली.
एनआयए (NIA), एनएसजी (NSG) आणि दिल्ली पोलिसांच्या विशेष पथकांनी संयुक्त तपास सुरू केला आहे. प्राथमिक तपासात स्फोटक पदार्थ वापरला गेला असावा, अशी शक्यता व्यक्त होत आहे. मात्र पोलिसांनी अजूनही दहशतवादी हल्ल्याची खात्री दिलेली नाही, कारण घटनास्थळी स्फोटकांचे तुकडे किंवा शॅप्नेल सापडलेले नाहीत. तरीही गृह मंत्रालयाने तातडीची बैठक बोलावून सुरक्षा स्थितीचा आढावा घेतला असून दिल्ली, मुंबई, लखनऊसह प्रमुख शहरांमध्ये उच्च सतर्कता जारी करण्यात आली आहे.
दरम्यान, दिल्ली पोलिस आयुक्तांनी नागरिकांना अफवांवर विश्वास न ठेवण्याचे आणि संशयास्पद वस्तू किंवा व्यक्ती दिसल्यास तत्काळ पोलीस नियंत्रण कक्षाशी संपर्क साधण्याचे आवाहन केले आहे. सध्या लाल किल्ला परिसरात मोठ्या प्रमाणात पोलीस व सुरक्षा दल तैनात असून तपास यंत्रणा सीसीटीव्ही फूटेज आणि डिजिटल पुरावे तपासत आहेत. देशभरातून या घटनेचा तीव्र निषेध व्यक्त केला जात असून, दिल्ली पुन्हा एकदा कडक सुरक्षा कवचात आली आहे.
